𝗜𝗟𝗢𝗜𝗟𝗢 𝗖𝗜𝗧𝗬 — Ginkakibot sang mga vendors sang Iloilo Central Market ang pagdakop sa mag-asawa nga subject sa ginpatuman nga drug buy-bust operation sang City Drug Enforcement Unit (CDEU) sa Brgy. Maria Clara, Iloilo City Proper.
Ang mga subject amo sanday Edgar Namang, 53-anyos, residente sang Bago City, Negros Occidental, samtang ang asawa sini amo si Jackie Namang nga residente sang Himamaylan, Negros Occidental.
Sa interview sang Bombo Radyo kay Police Lieutenant Colonel Antonio Benitez, Jr. head sang Iloilo City Drug Enforcement Unit, iya ginpahayag nga may yara sang kiosk ang mag-asawa sa nasambit nga merkado, sa diin, ginahimo nila ini nga cover up agud indi gilayon nga madakpan nga nagabaligya sila sang iligal nga druga.
Suno kay Benitez, gintul-id sang isa ka durugista nga una na nga nadakpan nga nagabaligya ang mag-asawa sang iligal nga druga paagi sa pagbaligya sang mga bulak, chicharon, kag mga panakot.
Nagamitan naman sang buy-bust items nga balor P13,000 ang mga subject antes nakuha ang 110 grams nga suspected shabu nga nagabalor sang P748,000.
Preso kag nagapangatubang subong ang mag-asawa sa kaso nga paglapas sa Republic Act. 9165, ukon Comprehensive Dangerous Drugs Act of 2002.
