Patay ang mag-asawa sang nabungguan sang isa ka utility van ang ila nasakyan nga motorsiklo sa Brgy. Buyu-an, Tigbauan, Iloilo.
Ang mga biktima amo sanday Leonardo Tagamolila, 52-anyos, kag Rhea Mae Tagamolila,45-anyos, teacher, lunsay residente sang Brgy. San Jose, Tubungan, Iloilo.
Ang driver naman sang van amo si Rommy Galas, 59-anyos, residente sang Alameda, Igbaras.
Sa interview sang Bombo Radyo kay Police Captain Alfred Mansoy, Chief of Police sang Tigbauan Municipal Police Station, iya ginpahayag nga padulong kuntani sa probinsya sang Antique ang van, kon sa diin nag-overtake ini sa salakyan sa iya atubang kag gulpyada lang nga nadulaan sang control ang driver.
Bangud diri, nabungguan sang van ang mag-asawa nga sakay sang motorsiklo.
Nag-agum naman sang pilas sa ulo ang mga biktima bangud sa tuman ka baskog nga impact sang van.
Suno kay Mansoy, ginhingagaw pa dala sa ospital ang mag-asawa, apang gindeklara gid ang mga ini nga dead on arrival sang attending physician.
Nahibaluan nga masami nga may nagaluntad nga aksidente sa amo nga lugar bangud man sa madanlog nga dalan.
