Dakop sa ginpatigayon nga drug buy-bust operation sang Iloilo City Police Station (ICPS) 4 ang isa ka iloy kag 21-anyos niya nga anak sa Zone 2, Barangay San Juan, Molo, Iloilo City.
Ang subject amo sanday Alyas Madam Inday, 41, kasado, kag caretaker sa sa guwa sang Bureau of Jail Management and Penology (BJMP) sa Ungka, Jaro, kag iya bata nga si Alyas Nene, college student.
Sila nga duha ang lunsay High-Value Individuals (HVI) kag residente sang nasambit nga lugar.
Sa interview sang Bombo Radyo kay Police Lt. Lloyd Pagulayan, deputy station commander sang ICPS 4, iya ginpahayag nga naglab-ot sa masobra duha ka semana ang monitoring sa mga subject matapos nakabaton sang impormasyon ang mga pulis nga nagkalain-lain nga mga tawo ang nagakadto sa balay sang alleged drug suspects.
Sang ginpatigayon ang operasyon, natigayon nga makuha ang 100 ka gramos sang ginapasuni nga ilegal nga droga nga may standard drug price nga P680,000.
Nahibaluan nga preso man ang bana ni Madam Inday sa BJMP, Ungka, Jaro sa kapareho man nga kaso nga paglapas sa Republic Act 9165 ukon Comprehensive Dangerous Act of 2002.
(Article: Bombo Phauline Pillora)
