PASSI CITY – Nagapasalamat ang mag-iloy nga nalakip sa mga Locally Stranded Individuals nga nakapauli sa Iloilo via Caticlan port.
Sa interview sang Bombo Radyo kay Roselyn Ricafort sang Brgy. Adcadarao, Ajuy, Iloilo, iya ginpahayag nga kaupod niya sa pagpauli halin sa Balagtas, Batangas City ang duha niya ka tuig nga bata.
Suno kay Ricafort, pag-abot nila sa Brgy. Aglalana, Passi City, nagpalab-ot sang mensahe ang Local Government Unit sang Ajuy nga pagasugaton sila sang salakyan kaupod ang duha pa ka residente sang Brgy. Progreso sa nasambit nga banwa.
Ginpahayag ni Ricafort nga nagatrabaho siya sa Batangas kag lima na ka bulan nga wala nakapauli bangud sa lockdown.
Halin sa Batangas, ginpahayag ni Ricafort nga ginpaidalom na sila sa Rapid test kag negatibo man ang resulta kag liwat naman sila nga ginpaidalom sa Rapid test pag-abot sa Brgy. Aglalana sa Passi City.
Apisar nga mandatory ang 14-day quarantine pag-abot sa banwa sang Ajuy, ginpahayag sang natungdan nga wala ini sang problema bangud ang importante amo nga makapauli sila sa ila balay.
