ILOILO CITY – Arestado ang mag live-in partner nga durugista sa ginpatigayon nga drug buy-bust operation sa Barangay Jalandoni Estate, Lapuz, Iloilo City.
Ang mga arestado amo sanday Yvone Francisco, 34, residente sang Brgy, Alalasan Lapuz, Iloilo City kag Ritz Gardose 35, residente sang Barangay Bolilao Mandurriao, Iloilo City kag lunsay temporaryo nga nagapuyo sa Barangay Legaspi dela Rama, Iloilo City Proper.
Sa interview sang Bombo Radyo kay Police Captain Val Cambel, team leader sang City Drug Enforcement Unit, iya ginpahayag nga tatlo ka semana nila nga ginamonitor ang mag-live in partner nga durugista.
Suno kay Cambel, nabaklan sang police poseur-buyer ang mga arestado sang P5,000 nga balor sang illegal nga droga.
Magluwas diri, nakuhaan pa gid ang mga ini sang 20 grams sang suspected shabu nga nagdangat sa P136,000.
Kalabanan nga mga customers sang nasambit nga mga durugista ang lunsay nagatrabaho sa call center ukon business process outsourcing.
Sa subong, preso na ang mga ini sa La Paz Police Station kag nagapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002.
