ILOILO CITY – Nagsungka sa Tubungan Municipal Police Station ang mag-asawa nga ginapahayag katapo sang Communist Terrorist Group.
Ang duha ka mga katapo sang rebelde nga group amo sanday Alias “Ka Nonoy”, supply officer kag residente sang nasambit nga banwa, kag live-in partner sini nga si Alias “Ka Bebe”, medical officer kag residente sang Sebaste, Antique.
Sa interview sang Bombo Radyo kay Police Major Rolando Araño, spokesperson sang Iloilo Police Provincial Office, iya ginpahayag nga masobra na sa pito ka tuig nga myembro sang Central Front Committee, Jose Percival Estocada Command, Baloy Platoon, Squad 2 ang duha.
Suno kay Araño, nagsungka ang duha pagkatapos sang tatlo ka bulan nga negosasyon.
Pahayag niya, nagdesisyon sila nga magbalik sa sabak sang gobyerno matapos narealisar nga wala sang kalinungan ang ila kabuhi kun padayon sila nga magsakdag sa amo nga grupo.
Dugang pa niya, gilayon sila nga nakabaton sang food packs kag kitchen kit nagikan sa Local Government Unit sang Tubungan pinaagi sa Municipal Social Welfare and Development Office bilang inisyal nga bulig.
Nagpasalig naman si Tubungan, Iloilo mayor Roquito Tacsagon nga makabaton sang dugang nga benepisyo nagikan sa banwa.
Samtang, gindayaw naman ni Iloilo Police Provincial Office director Police Colonel Ronaldo Palomo ang desisyon sang mag-live-in partner nga magsungka.
Nagpanawagan man ini sa iban pa nga katapo sang rebelde nga grupo nga magsungka na agud nga makaupod ang ila pamilya ilabi pa subong nga nagahilapit ang Christmas season.
