ILOILO CITY – Patay ang mag live-in partner sa natabo nga shooting incident sa Barangay Tuburan, Sta. Barbara, Iloilo.
Ang mga nagkalamatay amo sanday Jose Marco Ocampo, 48 kag Rachel Lopez, 40 lunsay mga residente sang Pavia, Iloilo.
Pilas sa tiyan kag ulo ang naagum ni Lopez samtang ginapahayag nga may pilas sa tiil si Ocampo.
Sa interview sang Bombo Radyo kay Ronald Mentoy, witness sa krimen, iya ginpahayag nga nanaog ang babaye sa salakyan kag nagpangayo sang bulig bangud nga ginahampak sang lalaki ang ulo sini sa salakyan.
Tuyo kuntani ni Mentoy nga magbulig apang may pusil ang lalaki.
Suno sa nakakita, antes nag-abot ang nag-responder nga pulis, natiruhan na ang babayi.
Pag-abot sang pulis, gilayon nga nagpalupok si Ocampo kag nagbalos ang kapulisan.
Ginhingagaw pa dala sa ospital ang mag live-in partner apang ginbawian sang kabuhi.
Ginapahayag nga ang salakyan nga gingamit sang mag live-in partner ang ginkawat lamang sa isa ka talyer sa C1 road.
Narecover naman sang kapulisan ang armas nga gingamit sang suspek.
