ILOILO CITY – Pilason ang mag-live in partner matapos nga gintiro sa Barangay Binabaan Labayno, Lambunao, Iloilo bangud gid lamang sa pato.
Ang mga biktima amo sanday Rex Agris, 38, construction worker; kag Kristien Armada, 36, lunsay mga residente sang nasambit nga lugar.
Ang suspek naman amo ang pakaduha ni Armada nga si Marciano Armada, 47 sang amo man nga barangay.
Sa interview sang Bombo Radyo kay Police Corporal Edran Lozarita, imbestigador sang Lambunao Municipal Police Station, iya ginpahayag nga antes natabo ang pagpaniro, naga-inum-inom ang suspek upod sa iya mga abyan sang ginsukmaan sang lalaki nga biktima nga amo ang nagpatay sa ila nga pato.
Matapos ang pag-inum-inom sang suspek, ginsulod sini ang balay sang mag-live in partner kag gintiro ang mga ini gamit ang 12 gauge short barrel shot gun.
Pilas sa wala nga kamot ang naagum sang lalaki nga biktima kag nadaplisan man ang live-in partner sini sang nasalabat.
Gilayon nga gindala ang mga biktima sa Dr. Ricardo Y. Ladrido Memorial District Hospital sa Lambunao, Iloilo apang ang lalaki nga biktima ang gin-refer sa Iloilo Provincial Hospital.
Ang babayi nga biktima ang nakagwa na sa ospital.
Sa subong, preso sa Lambunao Municipal Police Station ang suspek kag natalana nga pasakaan sang nagaka-igo nga kaso lakip na diri ang Violation sang Republic Act 10591 ukon “Comprehensive Firearms and Ammunition Regulation Act”.
