Padayon pa nga ginapangita sang mga pulis ang mag-ulutod nga nagluthang sa magtiyo sa Barangay Bacay, Dumangas, Iloilo.
Ang napatay nga biktima amo si Gilbert Doloritos, 38, samtang ang hinablos naman sini nga napilasan amo si Jory Castor, 22.
Ang ginapahayag mga suspek sa krimen amo sanday Bibik, Jojo, kag Bongbong De Asis, mga residente man sang amo nga lugar.
Sa interview sang Bombo Radyo kay Police Master Sergeant Kim John Banzon, imbestigador sang Dumangas Municipal Police Station, iya ginpahayag nga ginlambatan sang mga suspek ang magtiyo sang padulong na kuntani sila sa bilasyunan.
Naigu sa likod si Doloritos, samtang may igu naman sa ulo ang hinablos sini.
Ginpahayag ni Banzon nga nakit-an pa mismo sang utod sang napatay nga lalaki ang amo nga krimen, kag sang buot balikan sang mga suspek si Castor, ginapahayag naghapa pa mismo ang utod sang biktima kag nakitluoy.
Sandig sa imbestigasyon, may daan nga hiligut-anon sa tunga sang duha ka kampo.
Ang napatay nga biktima ang ginapahayag naulamid man sa pila ka komosyon sa amo nga lugar ilabi na kun makainom.
Posible suno sa otoridad nga nagdumot ang mga suspek. ##
