ILOILO CITY – Naga-amat-amat na hulag ang mga nagaplano nga magpadalagan para sa 2023 Barangay and Sangguniang Kabataan Elections sa syudad sang Iloilo.
Sa Barangay Boulevard, Molo, balantayan ang three-cornered fight sa pagka-punong barangay.
Liwat nga magapapili si Punong Barangay Virgilio “Kano” Villanueva kontra sa iya utod nga si Kagawad John “Jing” Villanueva nga anay punong barangay man kag si Kagawad June Espiya.
Sa interview sang Bombo Radyo kay Punong Barangay Kano Villanueva, iya ginpahayag nga ginarespeto niya ang desisyon sang iya magulang kag sang iya kagawad.
Sa tion nga magdaog siya, ini na ang ikaduha niya nga termino.
Suno pa sa iya, madamo pa sang mga proyekto sa barangay nga wala pa natapos.
Sa interview naman sang Bombo Radyo kay Kagawad Jing Villanueva, iya ginpahayag nga base sa ila una nga nahisugtan, isa lamang ka termino ang pungku-an ni Punong Barangay Kano kag magabalik siya bilang kagawad.
Ginpanugyanan pa niya ini nga bag-uhon ang batasan sini kag indi mangin suplado.
Apang sang ulihi, nakibot lamang ini nga nagbag-o ang pagtamud sa iya sang iya utod.
Dugang pa niya, kumpleto na ang iya line-up mangin sa Sangguniang Kabataan.
Samtang, ginarespeto man niya ang intensyon nga magpadalagan ni Kagawad Espiya nga iya man nga ihado.
