ILOILO CITY – Padayon pa nga gina-imbestigaran sang kapulisan ang background sang mag-utod nga nakuhaan sang masoba sa P13 million nga balor sang iligal nga droga sa ginpatigayon nga drug buy-bust operation sang Regional Police Drug Enforcement Unit (RPDEU)- 6 kag Silay Component City Police Station sa Barangay Lantad, Silay City, Negros Occidental.
Ang mag-utod amo sanday Angie Dumdumaya, 30 kag Angielyn, 25, mga residente sang nasambit nga lugar.
Nabaklan sang poseur-buyer ang mag-utod sang droga nga nagabalor sang Php 30, 000.00.
Na-recover dugang sa duha ang 2,010 grams sang shabu nga may ginabanta Php 13,668,000 nga drug price.
Ang duha ang ginkabig nga high value individuals (HVI).
Sa interview sang Bombo Radyo kay Police Lieutenant Colonel Arnel Solis, spokesperson sang Police Regional Office (PRO) VI, iya ginpahayag nga tatlo man ka bulan nga gin-monitor sang mga otoridad ang mag-utod.
Wala man sang daan nga record ang mag-utod sa iligal nga droga apang may yara sang impormasyon nga nakuha ang otoridad nga may kahilabtanan sila sa amo nga iligal nga aktibidad.
Padayon man nga ginahibalo kun bala, makabig sila nga downline sang mga anay dalagko nga durugista.
Ginpanginbulahan naman ni Police Regional Office 6 Director, Police Brigadier Leo M. Francisco ang mga police units nga nagpatigayon sang operasyon.
Suno sa director, ini ang magaserbe nga paandam sa iban pa nga involved sa illegal drug activities nga mag-untat na.
Sa karon, yara na sa kustodiya sang Silay Component City Police Station ang mag-utod kag pasakaan sang kaso sa paglapas sang Republic Act 9165 ukon ang Comprehensive Dangerous Drugs Act of 2002.
