Nagaplano si Senator Ronald ‘Bato’ Dela Rosa nga magkadto sa The Hague, Netherlands agud nga bisitahon si former President Rodrigo Duterte.
Pahayag sini, iya tinguhaan nga mag-apply sang visa antes ang May 2025 midterm elections.
“Mag-try ako mag-apply ng Schengen visa kung issuehan ako. Pag may pagkakataon, before elections, sana makabisita muna ako sa kanya,” suno kay Bato.
Sang ulihi, gindugang niya nga mahimo man siya maka-apply sang visa bisan pagkatapos na sang eleksyon — bisan magdaog man siya ukon indi.
Ginpamangkot man ang senador kun nahangawa man siya sa posibilidad nga i-detain siya kaupod kay Duterte. Apang sabat sini, kun magkadto siya didto, magasuksok na lang siya sang wig agud indi siya makilal-an. Naglahog man ini nga madamo siya sang klase sang masuksok lakip na ang afro wig.
“Sige lang. I-detain lang ako. Pero pagpunta ako doon sa The Hague, mag-wig ako. Mag-wig ako para hindi nila ako makilala doon,” kabahin sang iya sabat.
Sini nga Huwebes, Abril 3, nagtambong si Bato sa hearing sang Senate Committee on Foreign relations kaangot sa pag-aresto kay Duterte sang Marso 11 bangud sa kaso nga crimes against humanity sa International Criminal Court (ICC).
Si Bato amo anay ang chief sang Philippine National Police sang gin-implementar ni Duterte ang drug war gani nga ginapanan-aw ang posibilidad nga siya ang masunod nga dagdagan sang arrest warrant halin sa international tribunal.#
