Gin-ako sang alkalde sang Ajuy, Iloilo nga gintunaan sang madamo nga problema ang ‘first come, first serve’ basis nga COVID-19 vaccination sa isa ka elementary school sa amo nga banwa.
Ini ang kasunod man sang pagpa-Bombo sang isa ka residente angot sa ginapahayag mala-impyerno nila nga eksperyensya agud lamang makapatublok gamit ang Janssen brand COVID-19 vaccine sa amo nga vaccination site.
Ginapahayag man nga wala sang sistema ang ginpatigayon nga inoculation.
Sa interview sang Bombo Radyo kay Ajuy, Iloilo Mayor Jett Rojas, iya ginpahayag nga sadto, may yara sang listahanay sa kada barangay sang mga ngalan sang qualified vaccinees apang bangud sa pila ka mga isyu kaangay sang indi pagsunod sang mga pumuluyo sa ila schedule, mga reklamo nga may piniliay sa pag-avail sang bakuna kag iban pa, gintestingan sang Rural Health Unit nga magpatigayon sang ‘first come, first serve’ nga adjustment agud maka-avail sa vaccination ang tanan nga luyag magpabakuna.
Suno kay Rojas, gin-athag man sa mga pumuluyo nga las 4:00 pa sang kaagahon ang tagtaganay sang slot ukon number para sa COVID-19 vaccination, apang las 12:00 pa lamang sang tungang gab-i may mga nagpila na sa vaccination center tubtob magkaagahon.
Pahayag sang alkalde, sang ginabanta las 2:00 sang kaagahon, didto na kag nagbubo ang mamunog nga pag-ulan rason nga nagdinalagan ang mga tawo pasulod sa isa ka gym sa diin nalapas na ang physical distancing kag nagkinagual ang mga tawo.
Ginapahayag nga linibo ang nagpila sa vaccination site kag indi magnubo sa 450 ka indibidwal ang nabakunahan.
Bangud sini, nagpasalig man ang alkalde nga indi na ini maliwat sa diin magatukod ang banwa sang isa pa ka vaccination center kag dugangan man ang mga personnel nga maga-cater sa mga pumuluyo.
