Namalayi lang kuntani ang magbarkada sa banwa sang Leon, Iloilo apang nagresulta sa aksidente sa dalan nga ginkamatay sang isa sa ila kag tatlo naman ang pilason.
Natabo ang aksidente sa Barangay Agta sa amo nga banwa kun sa diin duha ka motorsiklo ang involved.
Ang napatay nga biktima amo si Jay-ar Agnote, 23, residente sang Barangay Dorog, Leon.
Sa interview sang Bombo Radyo kay Pol. Lt. Melchor Tolentino, officer in charge sang Leon Municipal Police Station, iya ginpahayag nga nakaangkon sang patal nga pilas sa ulo si Agnote kag nautod gid ang batiis.
Ang angkas sini nga si Jerald ang nakaangkon man sang pilas sa tiil, baba, kag kilay kag yara subong nagatinir sa ospital.
Ang 17-anyos nga driver sang isa ka motorsiklo kag ang angkas sini nga si Rhea Cagbay ang lunsay man nakaangkon sang pilas.
Sandig sa imbestigasyon sang Leon PNP, nagasundanay ang duha ka motor apang pag-abot sa Barangay Agta, nag-overtake ang menor de edad nga driver, nakabunggo sa motor ni Jay-ar, rason nga nakabunggo sanday Jay-ar sa steel railings.
Wala sang helmet ang mga biktima kag gina-alegar nga naka-inom inom pa antes ang insidente.
Nahibaluan nga antes ang insidente, nagtililipon ang mga biktima bangud nagpamalayi si Jerald sa balay sang nobya sini nga si Rhea.
