POTOTAN, ILOILO – Ginabanta P100,000 ang street value sang mga suspected shabu nga narekober sa magka live in partner sa ginpatigayon nga drug buy bust operation sa Cato-ogan, Pototan, Iloilo.
Ang magka live in partner amo sanday Bryan Rey Ballesa Solivien, 25 anyos kag Mary Grace Baking Bongcaras, 24 anyos.
Sa interview sang Bombo Radyo kay Pol. Staff Sergeant Raffy Gonzales, imbestigador sang Pototan Municipal Police Station, iya ginpahayag nga tokhang surenderee si Solivien kag nagbalik sa pagbaligya sang iligal nga droga.
Nabaklan sang duha ka sachet sang suspected shabu ang mag live in partner kag P1,000 ang buy bust money.
Apang na rekober naman ang 14 pa ka mga sachet sang shabu sa diin lakip ang isa ka dako nga sachet.
Ginapahayag nga sa Pototan lamang nagakuha sang shabu ang mag live in partner agud nga ibaligya apang padayon pa ini nga gina validate sang mga otoridad.
