Nagapati ang kapulisan nga organisado nga grupo ang yara sa likod sang nagakatabo nga modus sang rent-tangay sa Iloilo City.
Ini kasunod sang pagka-aresto sa mag-live in partner nga sanday alyas AJ kag alyas Cristine sa entrapment operation sa Molo.
Sa interview sang Bombo Radyo kay Police Captain Ryan Christ Inot, Officer in Charge sang Molo Police Station, iya ginpahayag nga antes ang operasyon, may nagreklamo sa ila estasyon nga tag-iya sang salakyan lakip na ang nagbakal sang unit gani gilahon nga naghulag ang otoridad.
Base sa reklamo sang tag-iya sang rent a car, nakibot nalang ini nga ginabaligya na online ang iya fortuner nga salakyan nga ginrentahan sang suspek.
Nagreklamo man ang nagbakal sang salakyan bangud peke ang mga dokumento nga ginhatag sa iya sang suspek.
Diri na ginplano ang entrapment nga nagresulta sa pagkaaresto sa duha.
Suno kay Inot, modus na sang mga suspek ang pagrenta sang salakyan kag ginabaligya.
Sa subong, preso ang mga ini sa Molo Police Station.
