Wala na sang kabuhi sang masapwan ang maglive-in partner matapos nga ginpaarakan sang luthang sa ila puluy-an sa Brgy. Pili 1-2-3, Hamtic, Antique.
Ang mga biktima amo sanday Jonathan, 51-anyos kag Angelita, 50-anyos nga lunsay mga residente sang nasambit nga barangay.
Suno kay PLT. Sirlan Mabaquiao, Deputy Chief of Police sang Hamtic Municipal Police Station, nagalantaw sa cellphone ang maglive-in partner kaupod ang isa pa ka myembro sang pamilya sang hinali lang nga may naglinupok kag didto na naigo ang mga biktima.
Igo sa dughan ang naangkon sang babaye samtang igo naman sa lawas kag ulo ang naangkon sang lalaki nga amo ang gintunaan sang ila kamatayon.
Madasig nga nagpalagyo ang wala pa makilal-an nga mga indibidwal nga naghimo ang krimen.
Nagapadayon pa ang imbestigasyon angot sa insidente.
