ILOILO CITY – Padayon ang operasyon sang Western Visayas Medical Center Laboratory nga amo ang lugar sa pagpatigayon sang test para sa coronavirus disease 2019.
Sa interview sang Bombo Radyo kay Iloilo 1st District Rep. Janette Garin, iya ginpahayag nga nangin mas madasig ang pag-test sa mga samples bangud may yara sang ginpahulam nga machine ang University of the Philippines Visayas.
Suno kay Garin, pinaagi sa test kits nga gindonar sang Chinese Government, mahimo ini nga maka akomodar sang 22 ka mga samples.
Sa bahin sang Guimbal, Iloilo sa diin na rekord ang tatlo ka mga positibo nga kaso sang COVID-19, nagpahayag ang congresswoman nga doble ang ginahimo nga paghalong sang nasambit nga banwa.
Panugyan ni Garin, kuntani likawan ang diskriminasyon indi lamang sa mga frontliners kundi amo man sa mga pasyente nga magpositibo sa nasambit nga virus.
Sa tion nga ginadiskriminar ang tawo, mas dako ang posibilidad nga magdamo ang kaso sang COVID-19 bangud ang iban nga tawo ang mapanago na lamang bangud sa kakulba nga ma eksperyensyahan ang diskriminasyon kun magpositibo sa balatian.
Nagpangabay man si Garin nga kun sin-o man ang naka direct contact ukon nakasalamuha sang COVID-19 patient, mas maayo nga ipa-test ini apisar nga asymptomatic ilabi na ang may mga balatian na nga naga-eksister kaangay sang diabetes, sakit sa tagipusuon kag high blood.
Dugang pa sang natungdan, kinahanglan nga indi magkakulba ang mga COVID-19 patients bangud may yara sang mga specialista nga nakahibalo sang proseso kag nakahibalo mag atipan sang maayo.
Ang kinahanglan sa subong pahayag ni Garin amo ang pag-isa sang tanan agud mapakigbato-an ang COVID-19.
