ILOILO CITY – Dumb parin sa 2023.
Ini ang komento sang publiko sa natabo nga pagpangawat sa Estados Unidos.
Ang mga kawatan ang kilala gid nga mga maalam apang kaangay sa iban nga butang… indi tanan!
Arestado ang duha ka tawo sa Florida matapos nga ang isa sa ila ang nagtawag sa 911 agud nga magpangayo sang bulig sa paghakwat sang mga gamit nagikan sa isa ka balay kun sa diin sila nagpangawat.
Suno sa Polk County Sheriff’s Office, nagresponde ang mga otoridad sa isa ka balay matapos nga may nagtawag sa emergency hotline apang wala sang may nagahambal.
Sang nag-abot na sila sa amo nga balay, nag-conclude ang mga otoridad nga wala sang tawo apang nakita nila ang isa ka lalaki upod sa iya nobya sa sulod sang balay sang ginsulod na nila ang wala nasiraduhan nga pwertahan.
Ginpahayag pa sang Sherrif’s Office nga ginapangita na nila ang lalaki nga suspect matapos nga na-identify sa isa ka security video sang pagpangawat sa Dollar General store sa Poinciana, Florida kun sa diin, madamo man sang nadula nga mga pagkabutang.
Samtang nga naga-istorya sa mga otoridad, ginpahayag sang babayi nga nagtawag siya sa 911 agud nga mabuligan sila sa pagdala sang mga gamit nagikan sa balay nga ila ginkawatan.
Indi lang ina, kinahanglan pa nila sang madul-ong sa ila sa airport agud nga mag-spend sang ila weekend sa New York.
Baw ka demanding!
Ginbuligan man sila sang mga otoridad kag gindul-ong pa.
Apang indi sa airport kundi sa Polk Pokey ukon sa Polk County Sheriff’s Office.
Suno pa sa otoridad, welcome gid sila sa sheriff’s office kag mas manami kuno didto kun ikumpara sa New York.
Ang magnobya ang sa karon, ginpasakaan na sang kaso.
