Nagpanawagan si Iloilo City Mayor Jerry Treñas sang “ceasefire” kag naghingyo man sa kaangay nga mga Ilonggo nga magpamalandong sa sining tion sang Kwaresma.
Sa statement sang alkalde sa iya Facebook page, ginsiling sini nga indi ini ang tion para sa gahod, mga akusasyon, kag pagpang-gatong sa pagbinahin-bahin sang mga tawo. Sa baylo suno sa iya, tyempo ini agud nga magpangayo sang kapatawaran, kag pangitaon ang kalinong sa kaugalingon.
“I will not dignify any baseless stories or attempts to distract our people with unfounded narratives. Ceasefire anay. Let us all focus on what truly matters: our conscience, our faith, and our responsibility to the truth,” suno sa outgoing mayor. “Sa sining tion sang Kwaresma, magpamalandong kita tanan. If we truly care for this city and its people, we will use this moment to reflect, not to attack,” dugang sini.
Ginklaro sang alcalde nga indi senyales sang kaluya ang iya paghipos, kundi isa ka “disiplina.”
“My silence now is not weakness – it is discipline. It is a choice to rise above the noise in the name of Christ, our faith, peace, unity, and the truth,” pahayag pa ni Treñas.
Ini nga statement ang kasunod sang gahod sa pulitika sa syudad subong nga semana, ilabi na sa pagsugod sang campaign period sang Marso 28 kun sa diin may pareho nga mga palagtik ang Team Uswag kag ang Team Sulong Gugma sa ila tagsa ka mga kampanya.
Ginsundan ini sang mga asud-asud nga posts sa social media, kun sa diin nagbalusay sang mga pahayag sanday Treñas kag ang alyansa nanday Iloilo City Lone District Rep. Julienne ‘Jamjam’ Baronda kag former Mayor Jed Patrick Mabilog.
Sa pormal nga pag-install kay Most Reverend Midyphil Billones bilang bag-o nga arsobispo sang Archdiocese of Jaro sang nagligad nga Abril 2, isa lang ka pulungkuan ang tatlo ka nasambit nga mga opisyal sa Jaro Metropolitan Cathedral apang wala sila naghatagay sang “sign of peace.”#
