ILOILO CITY – Hugot ang panindugan sang magpamilya nga nadakpan sa buybust operation sa Zone 2, Barangay San Juan, Molo, Iloilo City nga indi ila ang tatlo ka sachet sang suspected shabu nga ginaalegar narecover sang kapulisan sa ila balay.
Ang mga nadakpan amo ang amay nga si Gerardo Gevero, 53 anyos, iloy nga si Lucimar Gevero, 51 anyos, kag subang nga anak nga si Luger Revero, 34 anyos.
Matandaan nga nakuha sa possession ni Luger ang droga kag buybust money nga P15,200 kagab-i, Setyembre 1.
Sa interview sang Bombo Radyo sa iloy nga si Lucimar, iya ginpahayag nga nagalantaw siya sang TV sa pihak sang balay sang ginpatigayon ang buybust, baliskad sa blotter report sa Molo Police Station nga magkaupod sila sa balay sang ginpatigayon ang operasyon.
Suno kay Lucimar, ginkastigo sang kapulisan ang iya anak kag pilit nga ginpaako sa sala nga paghupot sang droga.
Indi matuod ini nga akusasyon suno sa natungdan bangud nagaobra sa construction ang iya anak.
Si Lucimar kag ang iya bana ang bag-o lang guwa sa presuhan bangud man sa pagduso sang iligal nga droga, apang suno sa natungdan, lunsay pato-pato lang sang kapulisan ang natabo sang una kag subong kag wala sila sang kahilabtanan sa amo nga aktibidad.
SUNO SA PUNONG BARANGAY
Samtang, suno naman kay Punong Barangay Pascual ‘Sipil’ Espinosa, parolado ang mag-asawa nga Gevero bangud sa kahilabtanan sa iligal nga droga.
Suno kay Espinosa, tumandok sang ila barangay ang amo nga pamilya.
Sa subong napaidalom sa selective lockdown ang Zone 2, San Juan, Molo, Iloilo City bangud sang narecord nga COVID-19 cases apang gin-athag ni Pascual nga wala nadala sa contact tracing ang magpamilya nga subong yara na nakahunong sa selda sa Molo Police Station.
