ILOILO CITY- Malapit isa ka milyon ka pesos nga illegal drugs ang nakuha sang otoridad gikan sa duha ka mga lalaki nga magparyentehanay sa ginpatigayon nga buy bust operation sa Ingore, La Paz, Iloilo City.
Ang mga nadakpan amo ang magpakaduha nga sanday Rocky Lengreo, 34-anyos kag Reynier Jacosalem, lunsay residente sang amo nga lugar.
Suno kay PLt. Col. Antonio Benitez Jr., chief sang City Drug Enforcement Unit, iya ginpahayag nga duha ka semana nga ginpaidalom sa monitoring ang mga subjects.
Dugang ni Benitez, si Lengreo ang ginakabig nga bigtime nga source sang illegal drugs sa ila nga barangay.
Narekober sa duha ang 20 tanan ka plastic sachets sang suspected shabu.
Ginapanginwala naman sang mga ini nga nagabaligya sila sang illegal drugs apang gin-ako nila nga nagagamit sila sang iligal nga druga.
Sa interview naman sang Bombo Radyo kay Punong Barangay Charity Montelijao sang Ingore, iya ginkumpirma nga nalakip gid man ang duha sa listahan sang mga drug personalities sa ila lugar.
