Wala sang gana si anay Presidente Rodrigo Duterte nga i-upod ang iya partido nga Partido Demokratiko Pilipino (PDP) sa partido ni President Ferdinand Marcos, Jr. nga Partido Federal ng Pilipinas (PFP).
Suno kay Duterte, bisan mag-updanay pa ang tanan nga partido, indi na kinahanglan nga magpakig-alyansa siya kag mas malipayon siya kun isahanon na lamang.
“Mas mabuti yung malayo kami. Magsama-sama na kayo lahat doon. Dito lang kami. Kaya nga sabi ko sa inyo, mas maligaya ako ‘pag mag-isa na lang ako. Nandoon na kayo lahat,” suno sa former president.
“Kung matalo man [ang PDP], I will sink on my own. Ako na ang lulubog mag-isa,” dugang sini.
Matandaan nga sang Huwebes, pormal na nga nakig-alyansa ang political base sang Villar Family nga Nacionalista Party sa partido ni President Marcos.
Nagpanguna si Marcos sa ceremonial signing sang alliance agreement sa tunga sang duha ka nasambit nga mga partido sa Taguig.
Magluwas sa Nacionalista Party, nagpirma man anay ang Partido Federal sang alliance agreements kaupod sa Lakas-CMD, Nationalist People’s Coalition, kag National Unity Party.
