ILOILO CITY – Gin-athag sang barangay officials sang Magsaysay, Iloilo City Proper nga apisar may bag-o naman nga executive order si Iloilo Mayor Jerry Treñas sa cufew, istrikto na nga ginapatuman ang pagbantay sa mga menor de edad kag pumuluyo sa ila lugar ilabi na kun gab-i.
Sa exclusive interview sang Bombo Radyo kay Barangay Kagawad Catalino Palomo, iya ginpahayag nga sa bulig kag pagpamuno sang ila mga barangay officials, matawhay ang ila pagbantay sa mga pumuluyo.
Suno kay Palomo, ginamanduan man nila ang mga ginikanan nga mangin responsable sa pagsaway sa ila kabataan nga indi na maguwa pagpatak sang alas 6:00 sa gab-i.
Suno sa natungdan wala man sang mga nga nagaobra ukon naga child labor sa ila lugar rason nga wala man sang nagalagaw nga kabataan.
Samtang, padayon man nga ginalunsyar sang Magsaysay, Iloilo City Proper ang road clearing operations sa mga establisemento komersyal, mga vendors kag negosyante nga nagasablag sa dalan.
Suno kay Barangay Kagawad Palomo, masami madakpan nga nagabalik ang mga vendors sa dalan.
Apang iya ginpahayag nga siya man mismo nagpangsaway sa mga nagasablag sa dalan nga magsunod sa mando sang Department of Interior and Local Government sa padayon nga pagpatuman sang road clearing operations.
