ILOILO – Nagapanidugan ang pamilya nga self-defense lang ang ginhimo sang isa ka magulang sang nabun-an sini kag napatay ang iya manghod sa Brgy. Balabag, Dumangas, Iloilo.
Ang biktima amo si Jose Longno, 58 anyos, kag ang suspek amo si Apolonio Longno, 65 anyos, subang sa ila nga pamilya. Ang duha ang lunsay residente sang nasambit nga lugar.
Sa interview sang Bombo Radyo kay Darrie Morales, hinablos sang duha kag amo ang nakasaksi sa krimen, iya ginpahayag nga nagahigda lang si Apolonio sang nag-abot ang manghod nga nagapangsita kag nagapanghangkat sang away.
Nagpanghandos pa sang malaba nga kutsilyo ang manghod apang nakalikaw ang magulang, nakaptan sa kamot ang manghod, kag nagpukutay sila.
Suno kay Morales, gintinguhaan pa kuntani niya nga bulagon ang duha apang nakita niya kun paano naagaw sang magulang ang kutsilyo kag una nga ginbuno sa mata ang manghod kag ginsundan sang duha pa ka handos nga nag-igu sa lawas sang biktima.
Sa pahayag ni Morales, madugay na nga abusar si Jose kag mabudlay ini hangpon sa ila panimalay bangud gina-alegar nga kun ano ang iya makita, gilayon man niya nga ginaangkon.
Sa interview naman sa suspek nga si Apolonio, iya ginpahayag nga kun wala niya gin-agaw ang malaba nga kutsilyo, posible nga siya ang napatay.
Suno pa sa suspek, madugay naman nga tahor ang iya manghod kag abusado sa ila nga balay.
Wala na nagpalagyo si Apolonio matapos ang krimen nga natabo kaina kag gindala na siya sa Dumangas Municipal Police Station.
(Bantayi ang dugang nga detalye may kaangtanan sa imbestigasyon sang Dumangas PNP.)
