ILOILO CITY – Patay ang magulang matapos ginbuno sang iya man lamang nga manghod sa Barangay Dolores, Balasan, Iloilo.
Ang biktima amo si Amply Tamesis, 18, samtang ang suspek naman amo si alyas “Boy”, 15, lunsay mga residente sang nasambit nga lugar.
Sa interview sang Bombo Radyo kay Police Captain Alexander Lauron, hepe sang Balasan Municipal Police Station, iya ginpahayag nga naka-inom ang biktima sang nagpauli sa ila balay upod ang iya mga pakaisa.
Sang nagpauli naman ang ila mga pakaisa, ginlagas sila sang biktima kag ginpasibangdan nga amo ang nagkuha sang iya nga vape.
Apisar nga ginasaway na ang biktima, nagabato ini sa gihapon sa iya amay rason nga nakabugtaw ang suspek.
Ginsaway pa sang manghod ang iya magulang apang ginsumbag ini gamit ang ‘pichikurno.’
Bangud na-impito, ginbuno sang manghud ang iya magulang.
Ginhingagaw pa dala sa ospital ang biktima apang ginbawian sang kabuhi bangud sa pilas sa na-tuo nga bahin sang iya lawas.
Sa subong, yara na sa kustodiya sang Municipal Social Welfare and Development Office ang menor-de-edad nga suspek.
