ILOILO CITY – Ginalauman nga ma-aprubahan na sang Senado ang mga key priority measures sang Legislative Executive Development Advisory Council pila ka adlaw antes ang pag-adjourn sang 19th Congress.
Suno kay Senate President Juan Miguel Zubiri, lakip sa mga priority measures amo ang Trabaho Para sa Bayan Act, Regional Specialty Centers Act, kag ang Maharlika Investment Fund Act, nga gin-certify sang Malacañang nga urgent.
Magluwas sa mga priority bills, ang Estate Tax Amnesty Act ang natalana nga aprubahan sa third reading suno sa Senate President.
Sa idalom sang Legislative Calendar, ang First Regular Session sang 19th Congress, nga nagsugod sang Hulyo 25, 2022 ang maga-adjourn sa Hunyo 2, 2023.
Suno kay Zubiri, sa tion nga mapirmahan na bilang layi ang apat ka mga priority bills, ang First Regular Session ang maka-produce sang pito ka priority measures sang administrasyon lakip na ang SIM Registration, ang Act Postponing the Barangay Elections, kag ang AFP Fixed Term Law, nga napasar na bilang layi.
Ang Senado sa idalom sang pagpamuno sang Zubiri ang nakapasar sang anum ka mga hagna bilang layi kun sa diin, ang apat diri ang national application.
Ang tatlo ka mga hagna ang pending sa gihapon sa conference committe, lakip na ang legislation nga Standardizing and Upgrading the Benefits for Military Veterans kag ang One Town, One Product Act.
Na-aprubahan man sang Senado sa third reading ang anum ka mga hagna nga pending sa gihapon sa House of Representatives.
Ang apat naman ka mga hagna ang natalana nga aprubahan sa Lunes lakip na ang Estate Tax Amnesty Act, nga aprubado na sa second reading sa Senado sang nagligad nga semana.
Magluwas sa Maharlika Investment Fund Act, walo pa ka mga Legislative Executive Development Advisory Council priority measures ang yara na sa advanced stages sa Senado suno kay Zubiri nga pending para sa second reading approval.
