ILOILO CITY – Nagaagi sa maid-id nga medical examination antes hatagan sang eyeglasses ang mga may yara sang deperensya sa mata.
Sa pagpaathag sang Medical expert nga si Dr. Jere Ledesma Cejar, Vice President sang Integrated Philippine Association of Optometrists, Inc. may yara sang objective kag subjective method sa pagkuha sang eye grade kun sa diin kinahanglan ini nga balansehon agud nga matadlong ang buron nga panan-awan sang pasyente.
Suno kay Dr. Cejar, may yara sang kondisyon nga kun kaisa, indi pareho ang eye grade sang pasyente nga nagakinahanglan man sang nagkalain-lain nga lens.
Ginpahayag ni Dr. Cejar nga ang deperensya sa mata ang mahimo nga palanubli-on, tuga sang bluelight gikan sa gadgets kag ultraviolet gikan sa sanag sang adlaw, ukon mapuling sang foreign objects.
Para naman sa mga may yara sang lazy eye kag cross eye, may yara man sang mga treatment agud nga ini ang matadlong.
May kaangtanan naman sa Sight Saving Month, may yara sang kampanya ang Integrated Philippine Association of Optometrists, Inc. nga “Panan-awan Mo, Amligan Ko”.
Suno kay Dr. Cejar, ang mga pasyente nga kwalipikado para sa libre nga eyeglasses amo ang mga naga-edad sang 40 anyos pataas.
Ang pagpili sang mga mahatagan sang eyeglasses ang ipaagi sa partnership sa Bombo Radyo kun sa diin id-idan ang medical examination agud mahibalu-an kun ano nga lens ang igahatag sa benepisyaryo.
Ang Integrated Philippine Association of Optometrists, Inc. suno sa natungdan ang magabayad sang tanan nga fee.
