Ginpaathag sang Philippine Atmospheric, Geophysical and Astronomical Services Administration (PAGASA) nga ang mahina nga Southwest Monsoon ukon Habagat kag easterlies amo ang rason kun nga mainit gihapon sa pila ka parte sang Pilipinas bisan nadeklarar na nga nagsugod na ang tag-ululan.
Suno sa state weather bureau, kun Habagat season na, kinahanglan kuntani nga may trigger kaangay sang frontal system sa ibabaw nga bahin sang Taiwan ukon bagyo sa nasidlangan ang Pilipinas para nga mapabaskog sini ang southwest monsoon.
Bangud wala ini nga trigger subong, mahina gihapon ang Habagat kag nagasulod man ang easterlies nga halin naman sa Pacific Ocean kag amo ang nagadala sang mainit nga hangin.
Bisan gina-forecast sang ahensya nga makalab-ot gihapon sa dangerous levels ang heat index ukon ang kapaang nga mabatyagan sa masunod nga inadlaw, indi man mataas ang temperatura kaangay sang naagyan sang Marso tubtub Mayo.
Ginalauman man suno weather bureau nga magabaskog na ang Habagat sa masunod nga inadlaw.
Mayo 29 sang gindeklarar sang PAGASA nga opisyal na nga nagsulod ang Pilipinas sa rainy season.
