Ginalantaw nga mas magadamo pa ang mais nga iga-import sang Pilipinas sa 2025 sandig sa projection sang US Department of Agriculture – Foreign Agricultural Service in Manila (USDA-FAS).
Nakasaad sa report nga ang corn imports halin Hunyo-Hulyo sa masunod nga tuig ang magadangat sa 1.63 million metric tons nga mas mataas sang halos 109,000 MT ipaanggid sa 1.521 million MT nga napagkit sang nagligad nga market year.
Gina-angot ini sang international agency sa pagtubo sang industriya sa poultry feed kag pet food.
Suno pa sa ahensya, ang gin-buhinan nga taripa sa corn imports ang nagahatag man sang suporta para sa sustained entry sang sini nga foreign stocks.
Matandaan nga sini nga tuig sang ginpaguwa ni President Ferdinand Marcos, Jr. ang Executive Order 62 nga nagapalawig tubtub sa 2028 sang mas manubo nga corn tariff rates nga singko porsyento sa in-quota imports kag kinse porsyento sa out-quota imports.
Gina-estimate man sang USDA-FAS Manila nga ang total corn feed kag residual consumption ang magadangat sa 7.6 million MT subong nga market year nga mas mataas sang 200,000 MT halin sa anay na-rekord nga 7.4 million MT.
Gindugang man sang ahensya nga ang mahinay nga pag-recover sang industriya sang baboy bangud sa African Swine Fever (ASF) ang maka-amot man sa pagsaka sa demand sa corn feed.
Sa pihak nga bahin, ang food, seed kag industrial consumption sang mais ang maga-saka man sa 2.23 million MT halin 2.2 million bangud sa mas mataas nga demand sa corn-based food snacks kag by-products kaangay sang cornstarch kag oil.
