Gin-ako sang Majority Floor Leader sang Iloilo City Council nga wala na sila nagapatigayon sang regular nga pre-session.
Ini kaangot man sa nangin sitwasyon sang konseho sang naglinigad nga bulan kon sa diin may indi pag-intindahanay nga natabo sa pila ka mga city councilors.
Sa interview sang Bombo Radyo kay Iloilo City Councilor Frances Grace Parcon, Majority Floor Leader sang Iloilo City Council, iya ginpahayag nga kon indi tuman ka importante ang diskusyonan sa council, wala na lang sila nagapatigayon sang pre-session.
Suno kay Parcon, sa subong, wala na sang regular nga pre-session nga nagakatabo, luwas kon importante gid ini nga topiko.
Ginakabig man sini nga isa ka palaagyan ang tikang agud nga malikawan na ang magamo nga dalagan sang session.
