“Waay pata gani sing bakuna, mga cha-cha ang ila gusto himuon. Waay pa gani kita ka boogie diri sa pandemya nga ini, ma cha-cha na naman kita?”
Ginhangkat sang Makabayan bloc si House Speak Lord Allan Velasco nga padayunon ang imbestigasyon tuhoy sa pagpabakuna sang presidential security group (PSG) nga indi rehistrado nga COVID-19 vaccine.
Sa interview sang Bombo Radyo kay Bayan Muna Party-list Representative Carlos Isagani Zarate, iya ginpahayag nga nagakadapat nga mag-ibestigar ang Kamara sa smuggled nga bakuna nga indi aprubado sang Food and Drug Administration (FDA).
Ini sa pihak sa nangin pahayag ni Presidente Rodrigo Duterte nga siya mismo ang mabawi sini sa mga PSG sa tion nga arestuhon sang mga otoridad.
Suno kay Zarate, kun indi mag-atubang ang PSG sa ila patigayunon nga imbestigasyon mahimo nila nga ipatawag ang FDA, Department of Health (DOH) kag Inter-Agency Task Force on Emerging Infectious Diseases (IATF).
Ginpahayag sang mamalidha nga nagakadapat may masampulan agud indi na pagpamarisan ang ginhimo nga iregularidad.
