Nagaplano ang mga mamalidha halin sa Makabayan bloc nga magsulat sa mga miyembro sang Dutch parliament agud nga pamatukan ang request ni former presidential spokesperson Harry Roque para sa asylum sa Netherlands.
Suno kay ACT Teachers party-list Rep. France Castro, plano nila nga mag-collaborate sa House of Representatives sa pagpadala sang official communication kaangot sa asylum bid ni Roque.
Magluwas pa ini sa signature drive nga ginlunsar sang Philippine-born Dutch citizen kag writer nga si Joel Vega nga nagapamatok man sa application ni Roque bangud sa argumento nga indi man ini biktima sang political persecution diri sa Pilipinas.
Ginpakamalaot naman ni Lean Jimenez sang Bayan-Europe ang tikang ni Roque, ginsiling nga nagapalagyo ini sa accountability, kag wala nagasabat sa mga alegasyon nga involved siya sa POGO operations kag sa human trafficking.
Matandaan nga una na ginkumpirma ni Roque nga isa na siya ka bonafide asylum seeker sa Netherlands nga buot silingon suno sa iya, indi na siya ma-deport pabalik sa Pilipinas samtang padayon ang proseso. Malipayon si Roque sang gin-share sini nga indi na siya kinahanglan magpanago kaangay sa iya ginahimo sa nagligad nga anum ka bulan.
Matandaan nga nangindulaan ang former Palace official kag nabalahuba nga yara na sa luwas sang pungsod matapos nga nag-isyu na ang Kamara sang arrest order kag gin-cite siya for contempt bangud wala sini nahatag ang mga dokumento nga makapamatuod kun ngaa gulpyada nagdamo ang iya manggad.
Una siya nga nakit-an liwat sa publiko sang Marso 14 kaupod kanday Vice President Sara Duterte kag Sen. Robin Padilla sa guwa sang International Criminal Court (ICC) premises, apang sang ulihi, ginkumpirma sang bise-presidente nga indi man parte si Roque sang legal counsel ni former President Rodrigo Duterte.
