Padayon nga nagapakita sang paglaum ang Makabayan bloc nga pamatian sang Korte Suprema ang ila gin-file nga mga mosyon may kaangtanan sa impeachment case batok kay Vice President Sara Duterte.
Bisan pa nga may ‘unanimous decision’ na ang mga mahistrado sang Korte Suprema nga indi pagpadayonon ang kaso, nagapati ang grupo nga posible pa nga baliktaron ini kag may paglaum sang reversal sa ila desisyon.
Sa ginpasa nga joint motion for reconsideration kag motion to intervene, ginapangabay sang Makabayan bloc nga usisaon liwat sang Korte Suprema ang ginpagwa nga deklarasyon, kag kilalahon nga unconstitutional ang ginpresentar nga articles of impeachment.
Suno kay Former ACT Teachers Party-list Representative France Castro, nagalaom sila nga tagaan sang hustisya kag pamatian sang Korte Suprema ang ila panawagan.
Nagpahayag man sang pareho nga handum si Kabataan Party-list Representative Renee Co, nga isa man sa mga nag-file sang mosyon. Suno sa iya, importante nga balikan kag pagatun-an liwat sang Korte Suprema kag sang Senado ang ginbuhat nga desisyon agud masiguro ang hustisya kag matuod nga pagserbisyo sa pungsod.
Ang Makabayan bloc, isa ka progresibo nga grupo sa Kongreso, padayon sa ila panindugan batok sa mga isyu nga ila ginakabig may kahilabtanan sa paglapas sa Konstitusyon kag katungdanan sang mga opisyal sang gobyerno.
