ILOILO/GUIMARAS – Pilas sa tiil kag sakit sa dughan ang naangkon sang isa ka survivor sa nagkulob nga pumpboat nga Jenny Vince sa tunga sang baybayon sang Iloilo kag Guimaras.
Sa interview sang Bombo Radyo kay Lester Dumalag, iya ginpahayag nga mapauli na kuntani siya sa Iloilo nagikan sa Buenavista, Guimaras apang wala sang byahe bangud sang una nga natabo nga pagkulob kag pagkapan sang duha ka mga pumpboat Chi-chi kag Keziah nga halin sa Iloilo padulong kuntani sa Jordan, Guimaras.
Apang gilayon man nga ginbalik sang Philippine Coast Guard-Iloilo ang byahe sang mga sakayang pangdagat.
Suno kay Dumalag, kampante man siya nga magsakay sa pumpboat bangud ginpahanugutan naman sang coast guard.
Apang sang nagapadayon ang ila nga pagbyahe, gilayon nga nagbaskog ang huyop sang hangin kag balod.
Bangud sini, nagtaking-king sa wala ang pumpboat kag wala man sang may nagabalanse sa tuo nga bahin.
Sang nagkulob na ang pumpboat, nakita niya ang duha ka mga pasahero sa iya tupad nga nagahinibi apang nagpanugyan si Dumalag nga magkalma sila kag mangin mabakod.
Gintinguhaan pa ni Dumalag nga alsahon ang trapal apang tuman ini ka bug-at.
Nangita sang pamaagi si Dumalag nga maluwas sa makahalanusbo nga hitabo gani nagsalom siya paguwa sa pumpboat kag nakita na niya ang idalom nga bahin sang pumpboat nga yara yara na sa ibabaw sang baybayon.
Ginapaminsar na lang ni Dumalag ang iya nga pamilya samtang nagahulat siya sang rescuer.
Dugang pa sang natungdan, wala sila sang may ginasuksok nga life jacket umpisa pa lang sang ila pagbyahe padulong sa Jordan.
Samtang, nagwaras kag nagsinggitan naman sa Guimaras Provincial Hospital ang isa na naman ka survivor sang Jenny Vince nga pumpboat nga nagkulob padulong kuntani sa Iloilo halin sa Buenavista, Guimaras.
Ang nagwaras kag nagsinggitan amo si Antonette Tolledo, 36 anyos.
Ini bangud nga nagakabalaka siya sa sitwasyon sang iya bana nga si Amador Tolledo bangud magka-upod sila sa isa ka pumpboat apang wala na niya ini nakit-an sang siya ang gin-rescue.
Apang matapos mahibalu-an ni Antonette nga yara na sa maayo nga kahimtangan ang iya nga bana, nangin kalmado na ini.
Daku naman ang pagpasalamat sang isa pa gid ka survivor sang pumpboat nga Chi-chi nga padulong kuntani sa Jordan, Guimaras nagikan sa Iloilo.
Sa interview sang Bombo Radyo kay Felipe Gayomali, 61 anyos, iya ginpahayag nga una nga nag byahe amo ang pumpboat nga Keziah kag ginsundan ini sang iya ginasakyan nga Chi-chi.
Bangud naghulaw naman ang ulan, ginpahanugutan man nga magbyahe ang mga sakayang pandagat.
Sang yara na sa tungaa sang kalalawran, gilayon nag-ulan kag nagbaskog ang hangin nga ginapatihan pugada.
Suno kay Gayomali, nakakas ang trapal kag banting sang pumpboat bangud sa tuman ka baskog sang huyop sang hangin rason man nga nagtaking-king kag nagkulob ini.
Nagsinggit pa si Gayomali sa mga pasahero nga indi magsalangisag.
Dugang pa sang natungdan, ang tanan nga pasahero sa Chi-chi ang wala nakasuksok sang life jacket.
Ginabanta nga 30 ka mga pasahero ang nakaguwa suno kay Gayomali samtang may mga tawo naman nga yara sa sulod sang pumpboat nga nabilin kag nagapamulpog apang indi na sila magbati-anay.
Nagdangat man suno sa iya sa tunga sa oras antes sila ma rescue.
