Nasapwan sang mga personnel sang Metro Pacific Iloilo Water isa ka mortar ammunition 81mm ukon vintage bomb sa Barangay San Isidro, Jaro Iloilo City.
Sa interview sang Bombo Radyo kay Punong Barangay Felix Doreza, iya ginpahayag nga nagakutkut sa higad sang karsada para sa pipeline ang mga personnel sang kumpaniya sang nasapwan nila ang vintage bomb.
Suno kay Doreza, delikado ang nasambit nga bomba bangud kun maigo ini sang matig-a kag pointed nga bagay posible nga magsigabong ini kag makapatay.
Ini man ang ang labing una nga kahigayunan nga may nakit-an nga vintage bomb sa nasambit nga lugar.
Samtang, suno naman sa Explosive and Ordnance Division (EOD) sang Iloilo City Police Office, kompleto pa ang components sang vintage bomb rason nga dako ang posiblidad nga maglupok ini kag makapatay.
Sa interview sang Bombo Radyo kay Police Major Garry Nee Tungala, pinuno sang Iloilo City EOD, iya ginpahayag nga high explosive ang content sang bomba nga mortar ammunition 81mm nga nasapwan sa lugar.
Standard military ammunition suno kay Tungala ang nasambit nga bomba sa diin ang purpose sini amo ang ”total distraction and to kill”.
Pahayag ni Tungala, wala man sang expiration ang bomba kag kun kompleto pa ang component sini, posible gid ini maglupok.
Sa subong, dal-on na sa opisina sang EOD ang vintage bomb kag igadispose lakip na ang iban pa nga explosives nga narekober.
