Abanse nga nagapasalamat ang Barangay Divinagracia, La Paz, Iloilo City sa daku nga drainage project nga natalana nga suguran sa ila barangay nga ginalantaw nga makabulig sa problema sa baha.
Sa interview sang Bombo Radyo kay Punong Barangay Maria Beth Teves, iya ginpahayag nga malapad ang himuon nga kanal kag naka-koordinar naman ang kontraktor nga malapit na lang ini umpisahan.
Ini ang ginalantaw nga makabulig sa ila mga residente nga makaluluoy man ang sitwasyon sa tig-ululan.
Dugang sini, subong nga wala pa nahimo ang daku nga kanal, gina-mentenar lang anay sang barangay ang pagpanglimpyo sa ila nga existing nga mga kanal rason nga naga-subside man ang tubig-baha kun matapos na ang ulan.
Ang daku lang nga problema suno sa iya amo kun magdungan ang mamunog nga ulan sa taob.
Nahibaluan nga anum ka mga zona sa barangay ang ginasul-ob ang baha sa kada magbubo ang mabaskog nga ulan ilabi na ang Zone 6 kun sa diin tuman ka apektado ang mga estudyante sang La Paz National High School.
