Nangin mabakal ang pinasahi nga burger patty kag nagagaragumo nga sticks gamit ang utan nga Takway nga ginhimo sang Agusipan Takway Growers and Producers Association sa Barangay Agusipan, Badiangan, Iloilo.
Ang pagbaligya sang mga pagkaon nga himo sa Takway ang ginpangunahan sang Agusipan 4H Club Multi-purpose Cooperative, isa ka barangay based organization sa idalom sang Department of Agriculture nga nagtukod sang nasambit nga asosasyon.
Sa interview sang Bombo Radyo kay Lourden Oremo, grade 12 student kag presidente sang Agusipan 4H Club Multi-purpose Cooperative, iya ginpahayag nga tuig 2018 sang nagtukod sila sang grupo agud nga maghimo sang mga proyekto nga makabulig sa komunidad.
Suno kay Oremo, humalin sang lamharon ang iya edad, natun-an na niya kun paano magtanom kag mangkiskis sang Takway bangud may yara sila sang malapad nga talamnan sang nasambit nga utan.
Pahayag ni Oremo, sa ila nga organisasyon, samtang nagapanggarab sila kag nagatanom sang mga utanon, nagdesisyon sila nga maghimo sang vlog sa diin gin-upload nila ang ila mga videos sa online.
Pinaagi diri, may isa ka pribado nga organisasyon nga nagpalab-ot sang bulig para sa mga local farmers.
Bangud man sa bulig sang Department of Agriculture, naka-innovate pa ang grupo sang mga pagkaon gamit ang mga utan nga ila gintanom kag isa na diri ang Takway.
Nagapasalamat si Oremo bangud nangin mabakal sa pila ka mga negosyo sa probinsya kag mangin sa syudad sang Iloilo ang ila gin-imbento nga burger patty nga himo sa takway bangud magluwas sa healthy ini, madamo man sang nanamitan.
Indi man magpaulihi ang takway stick nanday Oremo sa diin ini man ang naghatag sang ‘curiosity’ sa kadam-an kun ano ayhan ang sabor sini.
Panugyan ni Oremo sa kaangay niya nga pamatan-on, nagakadapat nga indi magpaga-id sa huol nga dala sang COVID-19 pandemic kag gamiton ang tanan nga talento kag ikasarang agud mangin ehemplo sa kadam-an.
Samtang, para naman sa coordinator sang Agusipan Takway Growers and Producers Association sa Barangay Agusipan, Badiangan, Iloilo, dako ang potensyal sang Takway agud mapasanyog ang ila nga pagpangabuhi.
Sa interview sang Bombo Radyo kay Randy Carmen, iya ginpahayag nga kaangay sang humay ang pagtanom sang takway sa diin nakit-an niya nga mabakal ini sa mga merkado.
Suno kay Carmen, ini bangud madamo sang recipe nga pwede himuon gamit ang utan nga takway.
Pahayag niya, nagabalor P30 kada kilo ang presyo sang ila ginproduce nga takway apang ang napanitan na kag pwede na maluto, nagabalor naman sa P60- P65.00 ang kada kilo sini.
Nagapasalamat man siya nga nangin madinalag-on ang iya pagpakigbahin sang kaalam sa agrikultura sa mga kabataan sa idalom sang ila grupo bangud sa subong, madamo na sila sang hinumuan.
Magluwas sa mga produkto gamit ang Takway, naglunsyar man ang grupo sang communal garden, native chicken raising, nursery kag Fishpond and Cultured Oyster Mushroom Production sa diin nagahimo man sila sang iban pa nga pagkaon gamit ang mga utanon nga ila gintanom.
