ILOILO CITY – Ginbudlayan ang mga bombero sa pagpalong sang kalayo sa natabo nga sunog sa Brgy. Old Airport, Mandurriao sang nagligad nga Byernes, Marso 11.
Ini bangud nga tama ka kitid sang dalan sa nasambit nga barangay rason nga indi makadali-dali sulod ang mga bombero.
Sa interview sang Bombo Radyo kay Fire Supt. Christopher Regencia, Provincial Fire Marshall sang Bureau of Fire Protection (BFP)- Iloilo, iya ginpahayag nga tama ka kitid sang mga dalan sa nasambit nga barangay dugangan pa sang nagapakadto pakari nga mga pumuluyo.
Nagpanugyan naman si Regencia sa mga pumuluyo nga indi na magbalik sa panimalay bangud ang mga gamit ang sarang pa nga mabakal apang ang kabuhi sang tawo, isa gid lamang.
Dugang pa ni Regencia, kun gab-i natabo ang sunog, dako ang posibilidad nga madamo sang na-trap nga tawo sa sulod.
Suno pa kay Regencia, ang Brgy. Old Airport ang nadala sa mapa sang mga barangay sa syudad nga makabig nga prone sa sunog.
