Nagpagwa sang pahayag ang Malacañang kaangot sa nagalapta nga mga dokumento sang Department of Public Works and Highways may kaangtanan kay Former DPWH undersecretary Catalina Cabral nga wala ini sang probative value.
Samtang, ginapilit naman ni Batangas Rep. Leandro Leviste nga matuod kag lehitimo ang mga nasambit nga dokumento.
Nahibaluan nga ginpaguwa ni Leviste ang dokumento halin sa napatay nga si Undersecretary Maria Catalina Cabral nga nagapakita sang alokasyon sang DPWH kada distrito, probinsya, kag rehiyon halin sang tuig 2023–2026.
Suno kay Palace Undersecretary Claire Castro, wala pa sang pamatuod nga halin ini sa DPWH kag puwede nga hearsay ukon peke ang mga dokumento.
Gin-insist naman ni Leviste nga nakuha niya ang mga dokumento mismo kay DPWH Secretary Vince Dizon kag ginpakita na ini sa ICI kag Ombudsman antes pa man napatay si Cabral sang Disyembre 19.
Samtang, suno naman sa National Bureau of Investigation (NBI) nga nakabaton sila sang bag-o nga dashcam footage nga possible mangin “importante” sa padayon nga imbestigasyon sa kamatayon sang anay DPWH Undersecretary nga si Maria Catalina Cabral .
