Ginpanginwala sang Malacañang ang alegasyon nanday Senator Alan Peter kag Senator Pia Cayetano nga ginagamit sang National Bureau of Investigation (NBI) ang imbestigasyon sa 2019 Southeast Asian Games agud pang-ipiton ang mga senador nga nagaserbe bilang senator-judges sa impeachment trial ni Vice President Sara Duterte.
Suno kay Palace Communications Undersecretary Claire Castro, mandato sang NBI ang mag-imbestigar kun may mabatian ukon mahibaluan ini nga posible nga anomalya. Gani sa opisyal, ang imbestigasyon kabahin lamang sang trabaho sang ahensya kag indi pagpang-ipit.
“Mandato naman po ng pamunuan ng NBI na mag-imbestiga kung mayroon silang naririnig, nalaman na anomalya. Kung ito ay sinasabing panggigitpit, ang aking narinig lamang ay ito ay papaimbestigahan,” pahayag sang Palace official.
Dugang pa sini, kun wala sang nahimo nga sala ang isa ka tawo, wala ini sang dapat kahadlukan sa bisan ano nga imbestigasyon.
“Ang tao na wala namang dapat katakutan ay hindi naiintimidate kahit kailan. Hindi ito pang-iintimidate, hindi ito panggigipit sa mga tao na wala anamng ginawang mali,” suno pa kay Castro.
Ginpahayag man niya nga ang pagbalik sang NBI sa kaso ang bunga sang mga impormasyon nga natipon matapos ang pagsinapol sang mga opisyal sa New Clark City sang bulan sang Hunyo.
Gindugang man sang Malacañang nga mahimo maghatag sang pagduda sa publiko ang pagkontra sang mag-utod nga Cayetano sa imbestigasyon.
Suno pa kay Castro, wala man sang madalom nga imbestigasyon nga nahimo sang una sa SEA Games bangud ginpahayag na anay ni anay Presidente Rodrigo Duterte nga wala sang sala si Alan Cayetano.
Una na nga gin-apinan ni Senator Pia ang iya utod sa amo nga isyu.
“I am bothered. There’s no jurisdiction in the world that allows a judge to be pressured and intimidated. I ask each one of you my dear colleagues, payag ba tayo sa ganito? Ganito na ba tayo dito ngayon?” suno sa senadora.
