Ginklaro sang Malacañang nga yara sa maayo nga kondisyon si President Ferdinand “Bongbong” Marcos, Jr. samtang yara ini sa New York sa Estados Unidos sang Amerika.
Ini apisar nakit-an ang presidente nga ginasip-on kadungan sang iya paghatag sang speech sa 70th Session sang United Nations Commission on the Status of Women.
Sa pamuno pa lamang sang speech, nakit-an nga nagtulo na ang sip-on ni Marcos apang gilayon man sini nga ginpahidan sang iya panyo.
Suno kay Palace Press Officer Undersecretary Claire Castro, normal lang ini bangud malamig ang tyempo sa amo nga state.
“Hindi ko po natanong kung siya ay may sipon. Pero siguro dahil sa sobrang malamig, baka normal lang,” suno kay Castro. “Kahit nga po tayo, ako nga po medyo kumakati-kati ang lalamunan, siguro normal lang sa weather. Pero he’s okay.”
Nagdangat sa 10ºC ang temperatura sa New York City sang amo nga adlaw sandig sa Google Weather.
Duha ka adlaw ang working visit ni Marcos sa Estados Unidos sang Amerika kun sa diin natalana man ini nga maghatag sang speech sa Special Session sang UN General Assembly kag iduso ang non-permanent seat para sa Pilipinas sa UN Security Council.
Nag-umpisa sa paggwa ang mga espekulasyon kaangot sa ikaayong-lawas sang presidente matapos ginkumpirma sang Malacañang nga na-ospital ini kag na-diagnose nga may diverticulitis — isa ka kondisyon kun sa diin may inflammation sa small pouches sa colon.#
