Ginpabugal sang Malacañang ang madamo na sang hinimuan si Presidente Rodrigo Duterte sa idalom sang iya administrasyon sa Iloilo Province.
Sa interview sang Bombo Radyo kay Presidential Communications Secretary Martin Andanar, iya ginpahayag nga dako na ang nabulig sang proyekto sang Department of Public Works and Highways (DPWH) sa pagtukod sang two-storey health center para sa mga residente sang Barangay Bucari Leon, Iloilo.
Suno kay Andanar, ang nasambit nga barangay health station nga may pondo nga P4.82 million ang nakabulig sa paghatag sang first aid services, maternal ukon child health care kag iban pa nga medical services sa mga pumuluyo.
Magluwas diri pahyag niya, nangin mahapos man ang paglabay sang mga salakyan kag commuters sa 1.11-kilometer improved access road nga ginkaayo sang (DPWH) sa Iloilo East Coast Capiz Road – Passi-San Rafael-Lemery-Sara Road pakadto sa Banate Port.
Nakompleto naman sang DPWH ang 1.75-kilometer by-pass road sa Iloilo-Capiz Road padulong sa banwa sang Barotac Nuevo, Iloilo.
Ang nakaayo nga dalanon suno kay Andanar ang nakabulig sa mga byahero nga makakinot sang oras sa pagbyahe.
May kaangtanan naman sa Panay-Guimaras-Negros Island Bridge Project, napasa na sang DPWH sa National and Economic Development Authority (NEDA) ang detalyado nga Engineering Design Cost Appraisal.
