Malacañang, ginpanginwala ang mga impormasyon nga na-ospital na naman si Marcos

Ginpanginwala sang Malacañang ang nagalapta nga mga impormasyon sa social media nga gindala na naman sa ospital si President Ferdinand “Bongbong” Marcos, Jr.

Suno kay Palace Press Officer Claire Castro, may private meeting pa kaina si Marcos kag maayo ang kondisyon sang lawas sini.

“The President was in a private meeting with the Presidential Management Staff this morning. He is well, healthy, and working even on a Saturday,” pahayag sang Palace official.

Nagapadayon ang presidente sa iya nga official duties suno kay Castro, apang wala na ini sang dugang nga detalye nga ginhatag.

Sang nagligad nga bulan, ginkumpirma sang Malacañang nga na-diagnose si Marcos nga may diverticulitis ukon ang inflammation sang diverticula ukon small pockets sa colon. Sang amo nga tion, ginlimitahan ang public engagements sang presidente agud nga makapahuway ini ka maka-recover.

Talalupangdon man nga nagniwang ang chief executive sa duha ka semana nga wala ini nakit-an sa publiko apang ginklaro sini nga bangud ini sa iya diet nga ginlimitahan lang sa sabaw.

Gintawag man sang 68-anyos nga presidente nga “highly exaggerated” ang mga rumor kaangot sa iya kamatayon.

Naghatag man ini anay sang mensahe nga indi dapat ma-excite ang mga luyag nga maglayas siya sa posisyon.

“Don’t get too excited just yet because it’s not a life-threatening condition,” mensahe anay sang presidente.