Ginpasiguro sang Malacañang nga nakaplastar na ang mga interventions kaangay sang pagpataas sang interest rates kun labi pa gid nga magsarurot ang balor sang Philippine peso kontra sa US Dollar.
Ini matapos nga nakahimo sang panibag-o nga record sang pinakamanubo nga balor sang piso kontra sa dolyar nga yara sa P59.50 sa pagtakop sang trading kahapon sa tunga sang global uncertainties bangud sa kinagamo sa Middle East.
Suno kay Palace Press Officer Undersecretary Claire Castro, nakit-an na sang gobyerno nga posible ini nga matabo bangud sa sitwasyon sa Middle East kag ini ang konsekwensiya.
Ginhimo ni Castro ang pahayag sa press briefing sa New York sa sidelines sang three-day working visit ni Presidente Ferdinand Marcos Jr. sa US.
Una na ginsiling ni President Ferdinand Marcos Jr. nga indi niya gusto nga magsarurot pa sa 60 pesos ang isa ka dolyar.
Matandaan nga antes pa man ang pagsugod sang kinagamo sa Middle East, ginpahayag sang BSP nga mahimo nga maglab-ot gid man sa P60 ang kambyo sang isa ka US dollar apang indi pa subong ukon sa pinakamadali nga tinion.
Words by: Bombo Ian Gajete
