Nagapati ang Malacañang nga indi dapat pagtawgon nga mahina ang mga kabataan sa subong nga henarasyon bangud sila ang paglaum sang pungsod.
Ini ang nangin sabat ni Palace Press Officer Undersecretary Claire Castro nahanungod sa pahayag ni Senator Robin Padilla sang gintawag sini nga mahina ang kabataan sa subong nga henerasyon kag suno pa sa senador nga indi uso ang ginatawag nga ”depression” sang tyempo sini.
Suno pa kay Castro dapat nga magapabilin sa tagipuson sang mga tawo ang nangin leksyon ni Dr. Jose Rizal nga ang mga kabataan ang paglaum sang Pilipinas.
Ginpunto man sini nga amo sini ang rason kun ngaa ginapakamaayo ni President Ferdinand Marcos Jr. ang mga programa para sa edukasyon kag ikaayong lawas sang mga kabataan.
Sa matandaan nga sang nagligad nga mga inadlaw, ginlaragway ni Padilla ang mga kabataan sa subong nga henrasyon bilang mahina kag sang ila tyempo indi pa uso ang tinaga nga ”depression.”
Ginbuy-an ini ni Padilla nga pahayag sa hearing sang Senate Committee on Public Information and Mass Media nahanungod sa Children’s Safety in Social Media Act.
