Wala pa sang ginapakita nga intensyon si President Ferdinand Marcos Jr. nga ideklarar nga persona non grata ang ambassador sang China sa Pilipinas.
Ini apisar nga ginpatawag sang Department of Foreign Affairs (DFA) si Ambassador Jing Quan kahapon agud ipaathag ang iya mga pahayag nga mahapos para sa China nga lupigon ang Pilipinas kun maggamit sila sang pwersa.
Suno kay Palace Press Officer Claire Castro, nahibaluan nila ang tindog sang presidente kag indi ini luyag nga magdeklarar sang amo sini batok sa representative sang iban nga pungsod.
“We know the President’s view. He would not want this kind of declaration against any representative of another country here,” suno sa opisyal sa press briefing.
Ginpahayag ini ni Castro matapos pamangkuton kaangot sa panawagan sang pila ka senador kag kongresista nga palayason si Jing sa Pilipinas.
Dugang ni Castro, ginatahod sang Malacañang ang opinyon sang mga mamalidha nga nagapanawagan nga palayason ang ambassador sang China, apang sa karon, indi pa ini ang ginapili nga tikang ni Marcos.
“Whatever opinions other leaders or senators may have, we respect them. But as we have stated, the President does not act outside of diplomatic channels,” dugang niya.
Suno pa kay Castro, ang tanan nga ginahambal sang presidente mahimo makaapekto sa pungsod kag sa mga pumuluyo sini.
Sa nagligad nga mga pahayag, ginkabig na sang DFA ang pagdeklarar sang isa ka diplomat nga persona non grata bilang katapusan nga option bangud mahimo ini magresulta sa mabug-at nga mga epekto sa relasyon sang duha ka pungsod.
