Nagpreparar ang Malacañang sang heroes’ welcome para sa team Philippines nga nagpasakop sa bag-o lang nagtakop nga 17th Paralympic Games sa Paris, France.
Maga-atubang ang anum ka mga atleta kay President Ferdinand ‘Bongbong’Marcos Jr. 2:30 karon sa hapon ukon duha ka adlaw matapos ang ila pag-abot halin sa Paris.
Ang team ang ginabug-usan sang archer nga si Agustina Bantiloc, taekwondo jin nga si Allain Ganapin, wheelchair racer nga si Jerrold Mangliwan, javelin thrower nga si Cendy Asusano, kag swimmers nga sanday Angel Otom kag Ernie Gawilan.
Si Marcos ang magapanguna sa amo nga special gathering kaangay man sa pagkilala nga ginhatag sa Philippine Olympic team sang nagligad nga bulan.
Nahibaluan nga wala sang medalya nga nabulsa ang team subong nga tuig apang nangin dalayawon man ang ila paninguha batok sa iban nga mga pungsod.
Si Asusano, halimbawa, ang nagpang-apat sa women’s javelin throw – F54 event.
Si Otom naman ang duha ka beses gid nagtapak sa finals sa 50m butterfly – S5 kag 50m backstroke samtang nakahingabot man sa finals si Gawilan sa men’s 400m freestyle S7.#
