ILOILO CITY – Ginmando na sang Malacañang ang paghatag sang dugang nga seguridad para sa pamilya Demafelis sang Barangay Ferraris, Sara, Iloilo.
Sa interview sang Bombo Radyo, ginpahayag ni Labor Secretary Silvestre Bello III nga nakabaton sang impormasyon ang Malacañang nga may pamahog sa kabuhi sang pamilya Demafelis.
Bangud sini suno sa tiglikom, nagpadala si Special Assistant to the President Christopher “Bong” Go sang security team para sa pamilya Demafelis.
Ang mga bulig sang gobyerno nga ginhatag, ang ginapatihan sang pamilya Demafelis nga rason sang pamahog sa ila kabuhi.
Sa interview sang Bombo Radyo, ginpahayag ni Barangay Kagawad Pablo Demafelis, tiyo ni Joanna Daniela Demafelis, ang Ilongga OFW nga ginpatay sang iya mga amo sa Kuwait, nga sa ila pag-intyindi, ang kwarta nga ginbulig sa ila sang nagakalain-lain nga ahensiya sang gobyerno kag ni Presidente Rodrigo Duterte ang rason kun nga-a may paghingabot sa ila kabuhi.
May mga indi kilala nga tawo suno sa barangay kagawad nga nagapadulong sa ila lugar kag ginbasol pa ang pamilya kun nga-a ginbantala sa media ang mga bulig nga ginhatag sang gobyerno.
Depensa naman sang pamilya Demafelis, mismo ang mga opisyal sang gobyerno ang naga-anunsyo sang ginahatag nga bulig sa pamilya kag indi nila ini mapunggan.