Nagpamalibad ang Malacañang nga maghatag sang komento sa pinakaulihi nga mga tirade ukon palabtik nga ginhimo ni anay President Rodrigo Duterte batok sa administrasyon ni President Ferdinand “Bong-bong” Marcos, Jr.
Ini kasunod man sa pagpangayo sang katapo sang media sa palasyo sang komento halin Presidential Communications Office (PCO) sa pinakaulihi nga pahayag ni Duterte, partikular ang iya sentimyento sa mataas nga presyo sang bugas.
Liwat man nga gin-swipe ni Duterte si Presidente Marcos Jr., liwat nga gin-akusahan ang chief executive nga nagagamit sang iligal nga droga.
Ginhimo ni Duterte ang mga tirades sa iya pagtambong sa proclamation rally sang Partido Demokratiko Pilipino (PDP) Laban sa Club Filipino, sa diin ginbayaw niya ang mga kamot sang iya mga gina-endorso sa opening salvo sang ila kampanya.
Suno kay Duterte, si Marcos isa ka Presidente nga high sa droga kag indi siya buang pero long-term ang epekto sa droga.
Gintumod man sini nga mabuang si Marcos sa dalayon nga paggamit sang heroin kag alab-ot niya ang 80 pero pag-abot sina nga tion, indi na siya makahulag.
Sang Enero 2024, gintawag man ni Duterte si Marcos nga “bangag,” kag ginbawi ini sang masunod nga bulan, nga nagasiling nga wala gid niya gin-akusahan si Marcos nga naga-intra sa ilegal nga droga.
Sang ginpamangkot kon ano ang reaksyon ni Marcos, siya nagsiling, nga anay presidente ang nagagamit sang fentanyl.
Suno kay Marcos, ang mga manugbulong ukon physicians ang dapat mag-atipan sa kay Duterte.
